sábado, 29 de maio de 2010

Polbo á prancha

Hoxe imos cunha receita moi sinxela pero ao mesmo tempo moi boa, unha receita que se probades, ben seguro que repetiredes: polbo á prancha.


Xa contei nalgunha ocasión que en terras galegas o polbo considérase un manxar. O arquicoñecido polbo á feira consiste simplemente en polbo cocido, aderezado con pemento, bo aceite de oliva e un chisco de sal gordo. Se se acompaña cuns cachelos cocidos na mesma auga do polbo ou simplemente cun anaco dun bo pan de Cea, entón convértese nun prato espectacular.

Pero, aínda que o polbo se consome por toneladas en Galicia, paradoxalmente a inmensa maioría de galegos comérono da mesma maneira durante toda a súa vida: á feira, e é unha pena porque a verdade é que este cefalópodo dá para moito máis. E iso é o que imos facer hoxe, probar a cociñalo dunha maneira algo diferente.

Polbo á prancha


INGREDIENTES (para 2 persoas):
- Un polbo pequeno
- 4 ou 5 patacas
- Aceite de oliva virxe extra
- Pemento (doce ou picante, ao gusto)
- Perexil picado
- Sal Maldon

PREPARACIÓN:
1- Se, coma min, tedes a sorte de poder mercar o polbo cocido na feira ou nalgún dos postos que cada domingo se colocan en multitude de puntos da cidade, pedide dúas racións, pero sen picar e sen aderezar. Levádeo a casa e deixade que arrefríe completamente.
Se non é así, cocede o polbo durante 40 ou 45 minutos ou ata que estea tenro e deixádeo arrefriar.

2- Unha vez o polbo estea frío separamos os brazos, cortamos a parte dianteira (o extremo) e reservamos. Collemos a parte traseira do tentáculo (a máis grosa), colocamos un coitelo ben afiado entre as dúas filas de ventosas e cortamos ao longo para separar ese anaco en dúas partes alargadas. Imos repetindo esta operación con todos os tentáculos do polbo.


3- Pomos unha prancha antiadherente ao lume e deixamos que se quente ben. Mentres, asperxemos os anacos de polbo con aceite de oliva e impregnamos por todas partes. Cando a prancha estea ben quente colocamos os anacos de polbo e deixamos que se marquen polos dous lados.

4- Mentres se asa o polbo, preparamos o aderezo. Para iso botamos nun bol aceite de oliva virxe extra e perexil picado e mesturamos ben.

5- Unha vez o polbo estea listo, colocámolo nunha fonte, botamos un pouco de pemento, asperxemos coa mestura de aceite e perexil, e un chisco de sal Maldon.

6- Servir inmediatamente e gozar...


PUNTUALIZACIÓNS:
- Como xa mencionei antes, o mellor acompañamento para este prato son uns cachelos cocidos na mesma auga do polbo, ou simplemente un bo anaco de pan do día. Nós adoitamos cocer unhas patacas ao vapor, que tamén están deliciosas aderezadas do mesmo xeito que o polbo.


- É importante deixar que o polbo se arrefríe de todo despois de cocido, porque deste xeito evitamos que se desprenda a pel cando se estea asando na prancha.

- A pel debe quedar crocante, pero non se debe queimar.


O dito, un prato moi sinxelo pero non por iso de baixa categoría, senón todo o contrario...

8 comentarios:

  1. Ola!!! estou de acordo contigo, un plato de categoría, eu ata diría que mellor que á feira, para o meu gusto...
    Un blogue moi chulo, noraboa!!!
    Un saúdo desde O Morrazo.

    ResponderEliminar
  2. Ola Ana,

    A verdade é que si, que é un prato sinxelo pero excepcional. Paga a pena probalo...

    Moitas grazas polo teu comentario!!

    Un saúdo

    ResponderEliminar
  3. Delicioso. Nunca o fixen á prancha na casa, aínda que non perdo ocasión de probalo. Apunto a receita. Un saúdo.

    ResponderEliminar
  4. Se o probas, seguro que repites... :)

    Un saúdo

    ResponderEliminar
  5. Guau, definitivamente a estas horas no puedo mirar blogs de cocina, estoy babeando! el pulpo me encanta, sea como sea, a feira, en ensalada, en guisos... pero así a la plancha, ayyyy qué delicia!
    Felicidades.

    ResponderEliminar
  6. Es verdad que el pulpo es un manjar se mire por donde se mire, y se cocine cómo se cocine...

    Gracias por tu comentario

    Un saludo

    ResponderEliminar
  7. Boisssimooooo xd....eu xa o catei... Unha aperta dende Chantada .

    ResponderEliminar
  8. Alégrame que che gustase.

    Unha aperta

    ResponderEliminar